التاج

انا جانى التاج من اعز اصحابى وهما

ميرو

ريمو

هوبا

بصراحة انا كنت مكسله ارد على التاج

بس قلت خلاص ارد لانه جانى من اعز اصدقاء ليا

وربنا يديم الصداقه الجميلة اللى بينا ويخليهم ليا يارب

نبتدى

احب شخص لقلبك في الدنيا؟

اقرب انسان لقلبى هى ماما وندى اختى وطبعا شريف

انسان مستعد تضحي بحياتك,ركز في كلمه حياتك,علشانه؟

اكيد برضة هما التلاتة ماما وندى وشريف لانهم اغلى واقرب ناس لقلبى

انسان كرهته لدرجه الجنون وتمنيت لو تمسك سكينه وتنقض عليه وتغرزها في قلبه وتقتله وتقف تبص لجثته وتشفي غليل قلبك؟

انا تقريبا مش بعرف اكره عمرى ما كرهت اى انسان عرفته مهما حصل منه

بس اللى بجد حسيت انى نفسى اقتله هو شارون

ماهو:اسم اجمل كتاب كتبه بشر قرأته ومحتفظ به حتي الان؟

مش عارفة بصراحة بس انا بحب اوى كتب مصطفى محمود وكان عندى منها مجموعة كويسة ولسة موجودة لحد دلوقتى

اهم جهاز منزلي انت متعلق بيه او بتستخدمه كتير؟

طبعا الكمبيوتر

مكان تحس بالراحه عندما تدخله؟

الاوضه بتاعتى

شئ تحس بالراحه النفسيه عندما تنظر اليه؟

البحر

مكان تحس فيه بالحنين الي شئ لاتدري ماهو وذكريات جارفه الي لاشئ؟

انا بحب اوى مكان بنروحة كل سنه فى فايد رغم ان ماليش فيه ذكريات بس المكان ده بحس فيه براحة كبيرة اوى

ااجمل مدينه زرتها داخل مصر؟

اسكندرية والغردقه

اجمل مكان طبيعي رأيته في مصر؟

اسكندرية

شخصيه كرتونيه بتحبها؟

انا بحب اوى اوى توم وجيرى

وبضحك من قلبى فعلا لما بتفرج عليهم وعلى المقالب اللى بيعملوها فى بعض

و بيفكرونى بيا انا وشريف علشان انا وهو مش بنبطل نعمل مقالب فى بعض

بس مش زى توم وجيرى طبعا اقل شوية

نوع هاتفك المحمول؟

نوكيا

سرعه البروسيسور جهازك؟

نسيت والله

حجم ذاكره,هارد,جهازك؟

80 هى الذاكرة 512_ والهارد

المساحه التي تشغلها المواد الاسلاميه علي جهازك؟

بصراحة مش كتير انا كان عندى جهاز تانى كان عليه مساحة كبيرة جدا من المواد الاسلاميه

بس لما غيرته نزلت مواد قرآنيه بس مش كتير لسه يعنى عندى المصحف كامل و ابتهالات و تفسير القرآن

نفس المساحه السالف ذكرها في قلبك الاجابه لنفسك علشان الرياء يااخواننا؟

الله اعلم بما فى الصدور

اهم هدف انت واضعه لحياتك الآن؟

اهم حاجة بنسبالى دلوقتى انى اخلص الكووورس اللى ابتديته

علشان ابتدى غيرة لانى ناوية اشتغل بأذن الله

وانى اكون جنب شريف قلبا وقالبا لان الفترة اللى جاية بالنسباله مهمه جدا فى حياتنا احنا الاتنين

وربنا يقدرنى ان شاء الله

مواصفات فتي الاحلام بالنسبه لك؟

مواصفات فتى الاحلام بتختلف كتير عن الحقيقه

بس الحمدلله انى لقيت حاجات كتير من اللى كنت بتمناها فى شريف

لان انا كان اهم شئ بالنسبالى ان احب انسان بيخاف عليا وبيحبنى واحس معاه بالامان

وده اللى انا فعلا لقيته مع شريف

وربنا يخليهولى يارب

صف الآتي :

شعورك لما بتسمع كلمه مصر؟

انا بحب مصر حب مالوش حدود مهما كان فيها من عيوب بس بحبها لما حد بيقول حاجة وحشه عليها بضايق جدا

انا بحب مصر ارض ووطن ماليش دعوة بحكومة وخلافات وعك من اللى بيحصل

شعورك لما بتسمع كلام عن اليهود؟

كفاية انهم قتله الانبياء

شعورك لما بتشوف ضابط شرطه؟

بصراحة ضباط الشرطة عاملين زى البلونه منفوخين على الفاضى

شعورك لما بتشوف كناس عجوز في الطريق؟

بصراحة كانوا الاول بيصعبوا عليا لكن دلوقتى مابقاش كناس بقى متسول و بقى فيهم ناس فى منتهى الغلاسة بصراحة

افكارك تجاه شاب ماشي في الطريق يلبس جلابيه بيضاء وقصيره وعمامه وله لحيه وبجيبه السواك وبيده المصحف ؟

الايمان فى القلب مش باللبس وربنا يهدى

احساس يراودك في اشاره المرور مغلقه بسبب مسئول كبير؟

بصراحة بضايق جدا جدا لانهم بيبقى مافيش عندهم لا شعور ولا احساس

يعنى لو فى انسان تعبان ولا بيموت مالهومش دعوة بأى حاجة

المهم المسئول اللى ها يعدى بقول بصراحة حسبنا الله ونعم الوكيل فيهم

تمت بحمد الله

والتاج تقريبا موجودة فى معظم المدونات فا علشان كدة

انا بهدى التاج لاى حد يدخل المد ونة عندى ويكون التاج ماجالوش

حسبنا الله ونعم الوكيل

كل يوم تخرج علينا فتاوى جديدة

وخرجت علينا هذه الايام فتوى اصدرها الدكتورالمبجل عزت عطيه

وهو رئيس قسم الحديث بكلية أصول الدين بجامعة الازهر

والتى اباح فيها ان ترضع المرأة العامله زميلها فى العمل

حتى ترفع عن نفسها حرج الخلوة المحرمة بينها وبين زميلها

ويقول أن رضاع الكبير يبيح الخلوة ولا يحرم النكاح

وذلك تبعا لرأي الليث بن سعد، مؤكدا إن المرأة في العمل يمكنها أن تخلع الحجاب

أو تكشف شعرها أمام من أرضعته وهذه هي الحكمة من إرضاع الكبير

فالعورات الخفيفة مثل الشعر والوجه والذارعين يمكن كشفها

أما العورات الغليظة فلا يجوز كشفها على الإطلاق

وأكد أن الإرضاع يكون بالتقام الثدي مباشرة

وقال د.عزت عطية إن هذه الفتوى تختص بأي رجل يخلو بامرأة في غرفة مغلقة لا يدخل عليهما أحد

ولا يختص الأمر بالموظفين والموظفات فقط فهذا يؤدي الى تشويش في الموضوع

لأن القضية تخص أي رجل وامرأة غريبة عنه تغلق عليهما غرفة خاصة ولا تفتح إلا بإذن أحدهما

لكن لو كان هناك أكثر من اثنين من الموظفين والموظفات في حجرة فلا يعتبر ذلك خلوة

ويستند الدكتور عزت الى حديث عن الرسول صلى الله عليه وسلم
والحديث هو

حدثنا ‏ ‏عمرو الناقد ‏ ‏ وابن أبي عمر ‏ ‏قالا حدثنا ‏ ‏سفيان بن عيينة ‏ ‏عن ‏ ‏عبد الرحمن بن القاسم ‏ ‏عن ‏ ‏أبيه ‏ ‏عن ‏ ‏عائشة ‏ ‏قالت:

جاءت ‏ ‏ سهلة بنت سهيل ‏ ‏إلى النبي ‏ ‏صلى الله عليه وسلم ‏ ‏فقالت يا رسول الله إني أرى في وجه ‏ ‏أبي حذيفة ‏ ‏من دخول ‏ ‏سالم ‏ ‏وهو حليفه فقال النبي ‏ ‏صلى الله عليه وسلم ‏ ‏أرضعيه قالت وكيف أرضعه وهو رجل كبير فتبسم رسول الله ‏ ‏صلى الله عليه وسلم ‏ ‏وقال قد علمت أنه رجل كبير ‏ ‏زاد ‏ ‏عمرو ‏ ‏في حديثه وكان قد شهد بدرا ‏ ‏وفي رواية ‏ ‏ ابن أبي عمر ‏ ‏فضحك رسول الله ‏ ‏صلى الله عليه وسلم

الحديث ثابت وصحيح ولا ريب فيه . وهو في الصحيحين : البخاري ( 4000 ، 5088 ) ومسلم ( 1453 )

وقصة الحديث تتلخص في :

أن أبا حذيفة كان قد تبنى سالما قبل أن يبطل التبني وصار كابنه تماما يدخل البيت وزوجة أبي حذيفة لا تحتجب عنه لأنه ابنها . فلما أبطل الله تعالى التبني صار سالم ـ وقد كبر ـ أجنبيا من " سهلة " امرأة أبي حذيفة التي جاءت تشتكي إلى النبي صلى الله عليه وسلم وتقول : إنَّ سالما كان أبو حذيفة قد تبناه يدخل علينا ونكلمه ، وقد بَطَلَ التبني ، فقال لها النبي صلى الله عليه وسلم : (( أرْضِعيه تَحْرُمِي عَلَيه )) .

ولا شك أن سالما لم يرضع مباشرة من ثدي امرأة أبي حذيفة كما يُصَوّر أهل الأفك

وفى شرح الامام النووى للحديث قال

(‏قال القاضي : لعلها حلبته ثم شربه من غير أن يمس ثديها ولا التقت بشرتاهما , وبهذا الذي قاله القاضي حسن , ويحتمل أنه عفي عن مسه للحاجة كما خص بالرضاعة مع الكبر والله أعلم )

ومع ذالك فهذا الحديث لا يأخذ به لموقف سائر أزواج رسول الله صلى الله عليه وسلم

فزوجات رسول الله رفضن مبدأ إرضاع الكبير

وبعد هذه الفتوى والضجة الاعلاميه التى حدثت بسبب هذة الفتوى

قامت جامعة الازهر بتشكيل لجنة برئاسة الدكتور أحمد عمر هاشم رئيس قسم الحديث الأسبق بالكلية

وعضوية عدد من أساتذة الحديث بالجامعة؛ لمراجعة الدكتور عطية عن فتواه
وصرح مصدر مسئول بالجامعة أن جامعة الأزهر كانت تستعد لاتخاذ إجراء مع الدكتور عزت

نتيجة فتواه المثيرة للجدل، كما أن رئيس الجامعة قد صمم على أن يكون هناك اعتذار على تلك الفتوى

وبالفعل قام الدكتور عزت بكتابة الاعتذاروهذا نص الاعتذار بخط يد الدكتور عزت عطيه

لقد قامت الدنيا ولم تقعد على الصحافة الدنماركية والغربية

لنشرها رسوما تسيء للرسول صلى الله عليه وسلم

وللاسف فإن بعض الفقهاءهم أشد إساءة للرسول صلى الله عليه وسلم

وللإسلام من أعداء الإسلام إذ ينقلون فتاوى ما أنزل الله بها من سلطان

ان امثال هذاالشيخ هم الذين يسيؤون للدين ولسمعة الأزهر
ولكن الى متى ستظل هذة الفتاوى تخرج علينا بين الحين والاخر

من علماء وفقهاء الدين الذين اصبحوا يشكلون خطرا على الدين الاسلامى

فكل يوم تخرج علينا فتاوى جديدة

مثل قرأة القرآن فى الحمام

واخر يقول ان شرب السجائر فى رمضان مباح ولا يفطر

واخرون كثيرا يخرجون كل يوم علينا بفتاوى غريبه والله ورسوله برئ من هولاء
حسبنا الله ونعم الوكيل

شغلك ولا المدام

امبارح كنا بنتكلم انا و(امشيرة) صديقتى العزيزة اللى هى ميرو

وانا مسمياها امشيرة لانها متقلبه زى شهر امشير بالظبط

وكنا بنتكلم عن ان هى لما تحب ترتبط بأنسان تكون هى اهم حاجة عنده من اى حاجة حتى شغله

و بالصدفه انا كنت قريت موضوع امبارح عن مين الاهم

الشغل ولا الحبيبه ولا الخطيبه ولا المدام اى مسمى مش هاتفرق

وكان فى واحد باعت بييقول ان الشغل اهم من المدام

و كاتب ايه الاسباب اللى تخلى ان الشغل اهم

وبصراحة كلامة كان لذيذ وعجبنى

وده كلامة اللى يمكن انا موفقاه فى جزء منه و معترضه على الباقى

يقول احمد وده اسمة :

بالله عليك بتحب مين اكتر المدام ولا شغلك

تتهم كل نساء العالم الرجال بأنهم يحبون شغلهم اكتر ما بيحبوهم

كا زوجات او كاخطيبات او كا حبيببات وانا بالنيابه عنى

اعترف ان هذا صحيح صحيح صحيح

لى اسبابى و مبرراتى التى ارجو منكم التفكير فيها بعين العقل

1- الشغل بيصرف عليا... بس انا اللى بصرف على المدام

2- فى الشغل ممكن تزعق براحتك و زعيقك يجيب نتيجة

مع المدام صعب تزعق براحتك ومهما زعقت مش هاتجيب نتيجة

3- ممكن تزوغ من الشغل فى اى وقت....انما تزوغ من المدام : هيهات انسى يا عمرو

4- فى الشغل عندك مدير ممكن ترضيه لو اشتغلت كويس... انما المدام لو عملت قرد مش ممكن ترضيها

5- فى الشغل من حقك تاخد اجازة عندك اجازة عارضه واعتيادى ومرضي غير ايام الجمعه والعطلات الرسميه

انما مع المدام مش ممكن تاخد اجازة بالعكس دا لازم تلزقلها

يوم الاجازة بتاعتك والا يبقى نهار الفاميلى مالوش ملامح

6- فى الشغل ممكن تترقى وتاخد منصب بيه وباشا كمان ويبقى ليك مكتب لوحدك

وفراش وسكرتيرة خاصة والكل يضربلك تعظيم سلام...

انما فى البيت هاتعيش زوج وتموت زوج واللقب الوحيد اللى ممكن لما تنادى عليك المدام

وتقولك يا ابو العيال او يا حاج ولما تعجز تقولك يا بركه

7-الشغل لو زهقت منه ممكن تسيبه بدون مشاكل وبسهوله ...

انما مع المدام لو روحك طلعت لازم تحط فى بقك كوتشى وتفكر مليون مرة فى

المؤخر والنفقه والعيال وتلاقى نفسك بتغنى انا اللى استاهل كل اللى يجرالى

(الغالى بعته رخيص ولا حسبوش غااااالى (العزوبيه طبعا

8- الشغل لو سبته او سويت معاشك او بلغت سن المعاش بتاخد مكافأة كبيرة

ومعاش وحفله تكريم ...اما المدام لو سبتها قبل ماتموت انت اللى هاتدفع مؤخر

ونفقه وشقه وتتحبس لو ما دفعتش بالتى هى احسن

9- ممكن تغير شغلك او تتنقل لو لقيت شغل احسن منه ...

لكنك طووووول الوقت بتشوف بنات احلى ميت مرة من المدام بس ماتقدرش تغيرها ...ظلم!

10-فى الشغل متأمن عليك علشان لو حصلك حاجة ..

المدام هى اللى هاتقبض التأمين

وفى النهايه

بتهوى مين اكتر المدام ولا شغلك ؟

الاجابة : المدام طبعا

*********

عجبنى كلامة رغم ان كتير من بنات جنسى ممكن يعترضوا ومايعجبهومش كلامة

بس فعلا كلامة فيه جزء كبير من الحقيقه

بس مهما كانت اهمية الشغل عند اى انسان

مايخليهاش تيجى على حساب اهتمامه بنصفه الاخر او نصفه الحلو

لان احنا وهنا بتكلم عن النساء بصفه عامه ديما بنكون محتاجين نحس بالاهتمام والحب

اكيد كل حبيبة او خطيبه او زوجة بتحب وبتسعد بنجاح الانسان اللى مرتبطة بيه

بس برضة بتكون محتاجة لحبه واهتمامة اكتر من اى شئ تانى

مش كده ولا ايه

أسألك الرحيلا

لنفترق قليلا..
لخيرِ هذا الحُبِّ يا حبيبي
وخيرنا..
لنفترق قليلا
لأنني أريدُ أن تزيدَ في محبتي
أريدُ أن تكرهني قليلا

بحقِّ ما لدينا..
من ذِكَرٍ غاليةٍ كانت على كِلَينا..
بحقِّ حُبٍّ رائعٍ..
ما زالَ منقوشاً على فمينا
ما زالَ محفوراً على يدينا..
بحقِّ ما كتبتَهُ.. إليَّ من رسائلِ..
ووجهُكَ المزروعُ مثلَ وردةٍ في داخلي..
وحبكَ الباقي على شَعري على أناملي
بحقِّ ذكرياتنا
وحزننا الجميلِ وابتسامنا
وحبنا الذي غدا أكبرَ من كلامنا
أكبرَ من شفاهنا..
بحقِّ أحلى قصةِ للحبِّ في حياتنا
أسألكَ الرحيلا

لنفترق أحبابا..
فالطيرُ في كلِّ موسمٍ..
تفارقُ الهضابا..
والشمسُ يا حبيبي..
تكونُ أحلى عندما تحاولُ الغيابا
كُن في حياتي الشكَّ والعذابا
كُن مرَّةً أسطورةً..
كُن مرةً سرابا..
وكُن سؤالاً في فمي
لا يعرفُ الجوابا
من أجلِ حبٍّ رائعٍ
يسكنُ منّا القلبَ والأهدابا
وكي أكونَ دائماً جميلةً
وكي تكونَ أكثر اقترابا
أسألكَ الذهابا..

لنفترق.. ونحنُ عاشقان..
لنفترق برغمِ كلِّ الحبِّ والحنان
فمن خلالِ الدمعِ يا حبيبي
أريدُ أن تراني
ومن خلالِ النارِ والدُخانِ
أريدُ أن تراني..
لنحترق.. لنبكِ يا حبيبي
فقد نسينا
نعمةَ البكاءِ من زمانِ
لنفترق..
كي لا يصيرَ حبُّنا اعتيادا
وشوقنا رمادا..
وتذبلَ الأزهارُ في الأواني..

كُن مطمئنَّ النفسِ يا صغيري
فلم يزَل حُبُّكَ ملء العينِ والضمير
ولم أزل مأخوذةً بحبكَ الكبير
ولم أزل أحلمُ أن تكونَ لي..
يا فارسي أنتَ ويا أميري
لكنني.. لكنني..
أخافُ من عاطفتي
أخافُ من شعوري
أخافُ أن نسأمَ من أشواقنا
أخاف من وِصالنا..
أخافُ من عناقنا..
فباسمِ حبٍّ رائعٍ
أزهرَ كالربيعِ في أعماقنا..
أضاءَ مثلَ الشمسِ في أحداقنا
وباسم أحلى قصةٍ للحبِّ في زماننا
أسألك الرحيلا..
حتى يظلَّ حبنا جميلا..
حتى يكون عمرُهُ طويلا..
أسألكَ الرحيلا..

نزار قبانى

تاج هوبا حبيبتى

وطبعا بعد جرعه التاجات المكثفة اللى بعتتهالى ريمو حبيبة قلبى

كملت عليا بوبا بتاج جديد

ماشى يا بوبا ميرسى يا حبيبة قلبى على التاج

وهو الحمدلله تاج بسيط

والتاج هو

اقول خمس حاجات محدش يعرفها عنى؟

يمكن تقريبا معظم اللى يعرفونى عارفين انى هادية بطبعى ومش بتكلم كتير

ورغم انى بحب الناس جدا وبحب اصحابى اوى بس برضة كلامى مش كتير معاهم

انا يمكن عندية شوية ودى حاجة محدش يعرفها عنى غير القريبين منى اوى

اوقات كتير من العند بيبقى جوايا تحدى ناحيه حاجة معينه

ولازم اوصلها طالما تحديت نفسى فيها

عصبيه شوية وده حسب الموقف اللى بتحط فيه

لكن اوقات كتير من كتر الضغط مش بعرف اتكلم

مش بحب اطلع اللى جوايا لو مضايقه بحب ديما احتفظ بيه لنفسى

انا بطبيعتى بحب الضحك والهزار بس كتير مايعرفوش عنى كده

يمكن ناس قليله جدا اللى بتكلم معاهم وبضحك وبهزر معاهم الناس القريبه منى اوى

ودول تقريبا معدودين على الصوابع

غير كدة انا مش بعرف ابدأ بالكلام مع حد

لو حد كان بيتكلم معايا وسكت بسكت مش بعرف افتح مواضيع

يمكن بسبب كدة ناس كتير فهمتنى غلط او اخدت عنى

فكرة مش صح انى مش عايزة اتكلم مع حد

بس انا عكس كدة تماما لكن هى طبيعتى ويمكن 3 بالكتير

اللى عارفين طبيعتى دى من اصحابى

عمرى ماعرفت الكره ناحيه اى انسان حتى لو اساء ليا

متسامحة لابعد الحدود وعندى القدرة انى افضل اسامح الى ماشاء الله

عمرى ما شيلت اساءة جوايا ناحيه حد

وده اللى اقدر اقوله عن نفسى ويمكن فعلا ناس كتير ماتعرفش عنى الحاجات دى

وميرسى يا بوبا يا حبيبتى على التاج

وانا برضة بمرر التاج لـــ

shery33

BaDBoY

FatelFury

جرعة مكثفة من التاجات

جرعه تاجات مكثفه من ريمو حبيبة قلبى
ماتقلقيش يا قمرى محدش هايدعى عليكى ولا حاجة
نبتدى بالاختبار الاول وهو انت شبه مين من القادة
هو بصراحة انا مش عارفة ايه وجه الشبه بينى وبين جيفاراهههههههههه
بس الاختبار طلع انى شبه جيفارا

وده الموقع

WHAT FAMOUS LEADER ARE YOU?


نيجى بقى لباقى التاجات
_ _ _ _ _ _ _ _

اسم مدونتك؟
re7ab

لماذا اخترته..وماهي نيتك من وراء اختياره؟

مافيش اى نوايا اختارته لانه اسمى

هل فكرت في إغلاق مدونتك؟..والسبب؟

لا خالص بس مابقتش انزل فيها بوستات زى الاول

صورتك في المدونة..رمزيتها؟

صورة بنوتة عجبنى شكلها اوى بترمز للهدوء والجمال

لماذا دخلت عالم التدوين من الاساس؟

صديقتى ميرو كانت قالتلى على المدونة و وريتنى المدونة بتاعتها

بس ما كنتش مأيده الفكرة اوى وبعدها ريمو وريتنى المدونة بتاعتها

بصراحة عجبتنى اوى اوى وقتها قررت انى اعمل مدونة

وكنت عملاها اساسا علشان انزل عليها الاشعار اللى شيرى بيكتبهالى بس بعد كدة بقيت بنزل فيها كمان مواضيع

احلى جمله قيلت لك فى وصف مدونتك؟

بصراحة ريمو وهبه وشيرى ديما بيشجعونى على اى حاجة بضيفها فى المدونة

من ناحيه الشكل و بيقولولى انها جميله

التعليقات بالنسبه لك ..اهميتها؟

اى تعليق او رد بيسعدنى طبعا بس مش ببقى منتظرة تعليقات

على قد منا بحاول اتكلم عن حاجات عايزة اتكلم فيها حتى لو ما جانيش اى تعليق

بس اكيد رأى اصحابى وشيرى بيهمنى فى اى بوست بنزله

احلى بوست كتبته ...ضع اللينك ..ثم اذكر لماذا؟

احلى بوست نزلته هو اللى كتبته بمناسبه مرور سنه على ارتباطى انا وشيرى

لانى وانا بكتبه كنت سعيدة جدا وكان نفسى الدنيا كلها تشاركنى سعادتى دى

أفضل مدونة قرأتها؟

بصراحة مدونات اصحابى بتعجبنى جدا و مدونة ريمو بصراحة عجبانى شكلا و موضوعا

أفضل بوست قرأته؟ وضع لينكه؟


Miss You DaD !!!! هما بصراحة بوستين الاول

وده كتباه بوبا حبيبة قلبى لانى لما قريته قعدت اعيط من الكلام المكتوب فيه

واثر فيا جامد جدا

والتانى بوست كانت ريمو كتباه الى حبيبى

و بجد حسيت بمشاعر حلوة اوى وانا بقراء البوست ده

واتمنيت وقتها ان كل واحد يلاقى الحب اللى بيدور عليه ومايكونش الحب مجرد احلام وخلاص

حد قل ادبه فى التعليق..ايه رد فعلك؟

ما حصلش الحمدلله لحد دلوقتى

أسوأ مدونة؟

مدونة غريبه انا كنت قريتها بس للاسف مش فاكره اسمها

وكان مكتوب فيها كلام غريب اوى والمشكله ان اللى كانت كتباه بنت

واستغربت جدا بجد من جرأتها فى الكلام

أسوأ بوست..أسوأ مدون؟

اى بوست واى مدون يخرج عن الحدود اكيد يبقى سئ
______________

هيحصل ايه لإيميلك لما تموتى؟

لما اموت ها يفضل الميل بتاعى زكرى لشيرى يفتكرنى بيه

اديتى الباسوورد لحد قبل كده؟

شيرى معاه كل الباسوردات بتاعتى

كانت إيه طبيعة علاقتك بيه؟

الانسان اللى بحبه ومرتبطة بيه

اسمك؟

رحاب

المشهور بيه وسط اصحابك؟

فى كتير .. رورا .. رورو..روبى..رحوبة

عمرك؟

23

برجك؟

العقرب 22/11

مجال دراستك؟

اداب/ اثار اسلامى

شخصيتك نوعها إيه؟

انا خجوله جدا طيبه وده بشهادة اصحابى اللى بيعرفونى

بحب الناس عمرى ما شيلت اى زعل جوايا من ناحيه حد بنسى اى اساءة

رومانسيه و خياليه اوى بحب اعيش فى الخيال والاحلام اكتر من الواقع

السفر بالنسبة لك؟

بحب السفر جدا رغم انى ماسافرتش كتير

المود بتاعك؟

انا انسانة مزاجيه جدا وعصبيه شوية

وقت فراغك بتعملى فيه إيه؟

بقعد على الكمبيوتر

الاكلة المفضلة؟

ورق العنب والفراخ البانيه

الصفات اللي أخدتها من بابا؟

المزاجيه دى انا واخدها من بابا لان بابا متقلب زيى كدة او انا اللى زيه

الصفات اللي أخدتها من ماما؟

الطيبه والتسامح والحب و الحنان اللى من غير حدود اكتر

ست حاجات بكرهها؟

الكدب
الخيانه
الغرور
الزحام
الكبدة
عصير البرتقال

اكتر ست حاجات بحبها؟

بحب شيرى و اصحابى اوى اوى اوى
بحب المطر
بحب ريحة البحر اوى
وزهور الزنبق
بحب الكمبيوتر بتاعى اوى اوى وبحس انه جزء منى ولما بيحصل فيه اى حاجة بقعد اعيط
وبعشق صوت فيروز

الشغل بالنسبة لك؟

كان نفسى اشتغل بس مافيش نصيب

الانترنت بالنسبه لك؟

هو حياتى حاليا اللى مقدرش ابعد عنها ابدا لانى لقيت عليه حاجات كنت مفتقداها وهو عوضنى عنها

__________________________

هل كنت طالب شاطر فى المدرسة ؟

كنت طالبه متوسطة لا شاطرة ولا بليده

إيه أكتر مادة حبيتها في المدرسة والكلية؟

فى المدرسة كنت شاطرة اوى فى العربى وكنت بحبه جدا رغم انى بكره النحو
وفى الكليه اكتر مادة حبيتها هى العمارة ودة بسبب اننا كنا بنروح زيارات كتير خارج الكليه

إيه أكتر مادة كرهتها في المدرسة والكلية؟

الرياااااااااااااااااااااااااااا ضة بكرها كره غريب بجد و الكليه كنت بستغلس التركى

كنت عايز تطلع إيه وأنت صغنن؟

والله وانا صغيرة كان نفسى اطلع حاجات كتيرشوية اقول مضيفه
و شوية مرشدة سياحية و شوية اطلع فنانه ارسم لوحات
يعنى ماكنتش مستقره على حاجة معينه
___________________________

SECTION 1 - Last 1s?
1. last beverage?
شاى

2.last phone call?
شيرى

3.last instant message?
من ميرو

4. last cd played?
تامر حسنى

5. last time you cried?
امبارح

6.last text message?
من ميرو وكانت بتقولى انها بتحبنى اوى

Section 2 - Have You Evers
1. dated someone twice?
لا

2. been cheated on?
لا

3. kissed someone & regretted it?
لا

4. lost someone special?
مافيش

5. been depressed?
اوقات كتير

6. been drunk and threw up?
لا

Section 3 -
List 3 Favorite Colors
الاسود ثم الاسود ثم الازرق

Section 4 -
This month have you Made a new friend?
لا

2. Fallen out of love?
لا

3. Laughed until you cried?
ايوة الحمدلله انا طول منا مع اصحابى وشيرى بضحك من قلبى فعلا لحد ما عينى تدمع

4.Met someone who changed your life?
ايوة الحمدلله واتغيرت للاحسن

5. Found out who your true friends were?
اكيد الايام بتظهر الشخص الى بيخدع و مع الايام هاتبان حقيقته

6. Is there something you want to tell someone?
عايزة اقول لشيرى انه وجودة فى حياتى خلانى احس بالامان وبأحلى مشاعر حب وربنا يخليك ليا يارب
وبقول لاصحابى بحبكوا اوى اوى حتى لو ماكنتش بتكلم معاكوا كتير بس دى طبيعتى وانتوا اكيد عارفنها لكن بحبوا وربنا يخليكوا ليا يارب و بقول لصديقه ليا عمر الحب مايكون بالطريقة دى انتى بطريقتك دى ها تخسرينى فى يوم من الايام

7. Would you kiss anyone on your top friends?
هههههههههههههههه ايه السؤال ده

8. How many people on your top friends do you know in real life?
للاسف مافيش لحد دلوقتى لكن قريب ان شاء الله هايكون حقيقة

9. How many kids do you want to have?
2

10. Do you have any pets?
كان عندى عصافير وطارت وجبت غيرهم و طاروا برضة وجبت سلحفاه وماتت واخر حاجة عندى حوض سمك كبير وفضل السمك يموت لحد ما اتبقى 3 سمكات ربنا يخليهمولى هههههههههه

11. Do you wanna change your name?
لا انا بحب اسمى

12. What did you do for your last birthday?
احتفلت بيه مع بابا وماما واخواتى فى البيت و مع شيرى واصحابى على النت

13. What time did you wake up today?
يعنى اقصى حاجه يوم ما اكون نايمة متأخرة اوى 11 الصبح

14.What were you doing at midnight last night?
كنت مع شيرى على النت بنتكلم

15. Name something you CANNOT wait for?
فى حاجات كتير

16. Last time you saw your father?
النهاردة الصبح

17. What is one thing you wish you could change about your life?
الشغل

18.What are you listening to right now?
سميرة سعيد قوينى بيك

19. Have you ever talked about someone behind their back?
حصل اكيد بس مش كلام يضر او كلام وحش بس ممكن تكون خلاص كلام عادى

20.What’s the last piece of clothing you borrowed from anyone?
لا مش بحب لا اخد لبس من حد ولا حد ياخد لبسى لكن ممكن مع اختى بس

21.Who’s getting on your nerves right now?
اكيد الكمبيوتر لما بيهنج كتير بتعصب جامد

22. Most visited webpage?
البلوج بتاعى

23. Coke or Pepsi?
بيبسى

24. Mac or PC?
PC

__________________________

ميرسى ليكى يا حبيبة قلبى على التاجات

وانا بمرر التاج ل

SHERY33

BADBOY

FATELFLURY

الحلقه 2 من رورا المفروسة.....المحمول حول الكعبة

النهاردة وانا بقرأ الجرايد لقيت حاجة لفتت نظرى
هو مقال للصحفى الكبير محسن محمد فى جريدة الجمهورية
المقال كبير جدا بس فى منه جزء اول لما قرتيه فكرنى بحاجة
فعلا شوفتها ولاحظتها و تقريبا الكلام اللى هو كاتبه ده
دا اللى انا شوفته وبيحصل فعلا وهو المحمول حول الكعبة
المحمول وما ادراك ما المحمول
وهذا جزء من كلام الكاتب الكبير محسن محمد
ومن هنا يدخل كثير من المصلين والداعين والمعتمرين إلي المسجدين
ومعهم المحمول ولو أنه بقي صامتاً لا يدق ولا يرن
ولو أنهم امتنعوا عن الحديث فيه ما كان لأحد أن يشكو
ولكني رأيت البعض لا يكتفي بأن يتكلم فيه في ساحة المسجدين
بل أثناء الطواف حول الكعبة
والبعض يبكي والبعض يبتهل والكل يردد الأدعية إلي الله
ولكنك تسمع من يتحدث في المحمول في شئون الدنيا
فيجعل الآخرين يخرجون من حال الدين إلي أحوال الدنيا
فهم يتكلمون في كل شيء ورجال الدين الذين يفتون في كل شيء هذه الأيام
لا يشيرون إلي مسألة حمل هذا التليفون داخل المساجد بصفة عامة أو في الحرمين الشريفين
بجد كلامة خلانى افتكرت حاجات حصلت معايا وشوفتها فعلا بعنيا
لما كنت فى العمرة فى رمضان اللى فات
سافرت العمرة مع بابا وماما فى العشرايام الاخيرة من رمضان
عقبالكوا كدة يارب
وكنت فى منتهى السعادة ومين ما يفرحش انه مسافر يعمل عمره
وامتى فى العشرة الاواخر من رمضان وهى فيها ليلة القدر
التى من قامها إيمانا واحتسابا غفر الله ماتقدم من ذنبه
بجد كانت سعادتى ما تتوصفش بس انا اتصدمت لما روحت هناك
لقيت حاجات اغرب من الخيال
قضيت 3 ايام جميلة فى المدينة ومهما اوصف فى جمال الحرم النبوى مش هقدر اوفيه قدره
ثم بدأت رحله العذاب والضنا من المدينة الى مكه
اتحركنا قبل اذان المغرب من المدينة متوجهين لمكة المكرمة
طبعا اذن علينا االمغرب وكنا طبعا كلنا صايمين
فطرنا على ميه وتمر فى الاتوبيس اللى كنا فيه روحنا وعملنا احرامنا فى ابيار على
و رجعنا تانى نكمل رحلتنا وطبعا احنا راكبين ومش عارفين اى حاجة فى الطريق
وقف بينا السواق(وهو سودانى الجنسية) فى استراحة غير اللى كانوا قايلين عليها
قولنا مش مهم ما علينا اهو حاجة نريح فيها شوية من قاعدة الاتوبيس المتعبة
طبعا كل ده ومافيش فطار الا هى الميه والكام تمرة اللى فطرنا عليهم لما المغرب اذنت
وما ادراك ما الاستراحة استراحة بجد غير اداميه بالمرة
بس قلنا خلاص عادى احنا رايحين نعمل العمرة بلاش نتكلم كتير
ورجعنا تانى الاتوبيس علشان نكمل رحلتنا الى مكه
اللى اعرفه ان الطريق من المدينه لمكه اقصى حاجة ممكن تستغرقها فى الطريق 7 ساعات
دا بالكتير اوى انما ناخد اكتر من 10 ساعات او تقريبا 11 ساعة فى الطريق
وكل ده من غير لا فطار ولا سحور غير القاعدة المتعبه اللى فى الاتوبيس
كل ده بسبب ان السواق مش عارف الطريق مش عارف يوصلنا مكه
وتاه ويلف بينا ويرجع تانى من مكان ما بدأ واحنا طبعا كنا فى حاله يرثى لها
تعبنا طبعا من كتر اللف وناس كتير اوى تعبت لان كان معانا ناس كبار فى السن
ومش متحملين اللف دا كله يادوب الحمدلله وصلنا قبل اذان الفجر تقريبا بربع ساعة
جرينا حطينا الشنط فى الفندق و شربنا ميه بعدها الفجر اذن نزلنا صلينا الفجر
و توكلنا على الله علشان نعمل عمرتنا طبعا الحرم ليه رهبه مختلفه تماما عن اى مسجد اخر
دخلنا الحرم فى وسط زحام شديييييييد ولا يوم الحشر
طبعا اول ما عنينا وقعت على منظر الكعبة دموعنا بقت تنزل لوحدها
و بقينا عمالين ندعى بدأنا نعمل عمرتنا وبدأنا طبعا بالطواف
مهما وصفت الزحام اللى هناك مش ممكن اقول عليه فعلا غير يوم الحشر
كنا ماسكين انا وماما فى بابا جامد اوى لان لو حد فينا ساب التانى مش ها يلاقيه
طبعا مش هقول التعب بجد اللى كنا فيه احنا كنا تقريبا بنحارب علشان نعرف نطوف
لكن رغم دا كله والتعب دا كله لفت نظرى بجد حاجة غريبه جدا
ان الناس وهى بتطوف فى منهم ماسكين الموبايل وعمالين يتكلموا
الله؟؟؟؟؟؟
هو ايه اللى انا شيفاه ده يمكن تأثير الزحمه والتعب والارهاق مش شايفة كويس
بس للاسف انا مالقتش رجاله بس بتتكلم لا دا رجاله وستات
ماسكين الموبايل فى الطواف بيطوفوا وبيتكلموا
اللى اعرفه ان المفروض الواحد بيدعى اثناء الطواف
لكن اطوف وانا بتكلم وبهزر وبضحك فى الموبايل اهو ده كان حاجة غريبه جدا بالنسبالى
قلت معلش يمكن دى تليفونات ضرورية ولازم يتكلموا
خلصنا الطواف بعد ما كنا هانموت طبعا فى الزحام و بنكمل عمرتنا
و وصلنا للسعى بين الصفا والمروة دخلنا السعى وبدأنا
لقيت برضة ناس فى السعى ماسكة الموبايل و عماله تتكلم و تضحك
استغفر الله العظيم هو انا بعمل العمرة فى الحرم المكى ولا فى شرم الشيخ
حسيت ان ضغطى علي عليا بجد
لا واللى يغيظ ويفرس بجد انك وانت بتصلى فى الحرم تلاقى جنبك موبايل بيرن
و اغنية شغاله عادى غصب عنك ها تخرجك من خشوعك فى الصلاة
طيب ليه حتى مانقفلش الموبايل واحنا داخلين الحرم؟؟؟؟
بلاش نقفله نعمله سايلنت
فين قدسيه المكان اللى احنا فيه ؟؟؟؟؟
بقيت مستغربه من اللى شيفاه
بقيت اقول ايه اللى احنا وصلناله ده فين الخشوع والبكاء والدعاء؟؟؟؟؟؟؟؟
كل دا راح فين ؟؟؟؟؟؟؟؟
ايه اللى بقينا فيه ده
ونقول حرب شرسة ضد الاسلام والمسلمين طيب ايه اللى بيعمله المسلمين ده ؟
ازاى فى مكان زى دة ويحصل فيه كدة
ازاى وانا بطوف ولا بسعى بدل ما ادعى وابكى ندما على كل اخطائى
اقعد اتكلم واضحك فى الموبايل؟؟؟؟
ازاى ابقى فى الحرم واسمع اغنية طالعة من موبايل ؟؟؟؟؟؟؟؟
الف سؤال وسؤال داروا فى دماغى وقتها بس مالقتش اى اجابة على اسألتى دى
انا يمكن حاولت اختصر على قد ما اقدر فى كلامى
ويمكن فى حاجات كتير اوى اوى ما قولتهاش
لانى لو فتحت فى الكلام ها اقول كلام صعب انه يتقال
صعب علينا كا مسلمين اننا نوصل للحال ده
ويمكن ماكنتش احب اتكلم فى حاجة زى دى
بس الواضح ان الموضوع بقى اكبر من كدة
والدليل على كدة انه اتكتب عنه فى الجرايد يعنى بقى شئ ملحوظ وزاد عن حده
بجد مش هقول غير انى فعلا متغاظة ومفروسة من اللى بشوفه واللى بيحصل
والسلام ختام
اللهم اعز الاسلام والمسلمين واذل اعدائك اعداء الدين
اللهم اميييييييييييييين

حلقات رورا المفروسة ...البروووم

انا لانى متغاظة بجد من حاجات كتير بشوفها وبتحصل

قلت اكتب عن حاجة كل مرة ببقى مفروسة ومتغاظة منها

ودى هاتبقى على حلقات كل مرة ها اتكلم عن حاجة معينه

واكيد هايكون فى ناس كتير مفروسين زيى ومتغاظين من الحاجات دى

اول حاجة بجد ها اتكلم عليها هى البروم

البروم متهيألى معظمنا يعرفوه وهى حفله نهاية السنه الدراسيه

انا لقيت الموضوع ده انتشر بصورة كبيرة اوى واخد حجم اكبر من حجمه

دلوقتى كل ما افتح جريدة او مجله الاقى بروم مدرسة كذا و بروم مدرسة كذا

او بروم كليه كذا لقيت ان الموضوع زاد عن اللزوم

ماشى نعمل حفله لنهاية العام الدراسى ماقولناش حاجة

لكن دى مابقتش حفلات زى اللى كنا بنعملها فى المدارس و نلبس لبس غريب كدة

و نقعد نعمل تمارين رياضيه على موسيقى حلاوة شمسنا واتفرج على الحلاوة حلاوة

الموضوع بقى فعلا اكبر من كده بكتير

دلوقتى بتتحجز قاعات فى الفنادق الكبيرة للبرومات دى

وبيجيبوا فيها مطربين مشهورين لا وكمان ايه البرومات بقت بتذاكر

وطبعا كل شئ بتمنه يعنى كل ما المطرب كان مشهور ومحبوب

كل ما التذكرة بتاعة البروم بتكون اغلى

واللى جننى بجد ان فى مدارس هى اللى بتتولى عمل البرومات دى

و بتبيع التذاكر اللى بتوصل لرقم وجنبه 3 اصفار

بجد مش حاجة تغيظ وتفرس

ولا البنات و الاولاد اللى بيبقوا فى البروم

طبعا كل بنت بتحاول تكون اشيك واحده

و كمان كل ولد بيلبس الحته اللى على الحبل

انا بشوف الصور بتاعت البرومات

بلاقى البنات لابسة فساتين بتكشف اكتر ما بتستر

ولا صورهم وهما بيرقصوا على واحده ونص

دى مابقتش واحدة ونص دى بقت واحدة الا ربع

و طبعا الفساتين دى هى كمان بتتكلف شئ وشويات

وعلشان طبعا فى تنافس كبير بين المدارس وبعضها و الكليات وبعضها

بقوا يخترعوا افكار جديدة للبرومات

دى يعنى مثلا يعملوا الكينج والكوين ملك وملكه الحفله

ودى حاجة طبعا بتخلى البنات و الولاد يتنافسوا فى ان كل واحد يلبس

اغلى حاجة واحلى حاجة

!!!!ونرجع نقول الله دا مافيش فلوس فى البلد

امال الحاجات دى بتيجى منين؟

وكمان صورالبنات مع المطربين الشباب

زى تامر وهيثم شاكر و محمد حماقى تحس ان المطرب فيهم

مش عارف ياخد نفسة من لازقة البنات فيه

الحاجات دى كلها احنا واخدنها من الغرب

طيب ليه مانخدش الحاجات الكويسة اللى عندهم ؟

ليه ديما بناخد اسوء حاجة ونعملها؟

ليه بقينا عاملين زى البغبغانات بنقلد وخلاص ؟

ليه بعدنا عن عداتنا وتقاليدنا وشرقيتنا ؟

وسلملى على وزارة التربيه والتعليم

الـتـاج

انا يمكن بقالى كتير ما نزلتش حاجة فى البلوج

بس التاج لما جانى من حبيبة قلبى ريمو

كان لازم ادخل و ارد طبعا على السؤال

وهو يمكن زى ما ريمو قالت ان السؤال ممكن يكون سهل

بس اجابته تحتاج كلام كتير

والسؤال كان

تكلم عن هواية لما بتمارسها بتستغرق فيها تماماً

وتنفصل عن عالم الواقع لفترة من الوقت أثناء ممارستها

بس انا ها احاول اختصر على قد ماقدر

وانا لما قريت كلام ريمو اكتشفت ان فى حاجات كتير مشتركة بينا

والحمدلله احنا اصحاب وريم صديقتى واختى وحبيبة قلبى

انا كمان بحب الرسم من صغرى وكنت كل ما اشوف اى حاجة ارسم عليها

مش هاتفرق هى ايه ورقة حيطة كرتونة كل حاجة كنت برسم عليها

بس رسمى ديما كان عن الطبيعة ماعرفش ارسم بورتريه

لكن ارسم شجر بحر اى حاجة من الطبيعة

كان نفسى ادخل كليه الفنون الجميلة لكن هو النصيب

انى مقدرتش ادخل الكليه اللى بحبها

بحب اوى ارسم كاريكاتير وبرسم اشكال غريبه

و بحب الرسم على الازاز ورسمت حاجات كتير على الازاز

الرسم هو كان اهم حاجة عندى

وعندى هواية تانيه يمكن هى غريبه شوية بس هى برضة فعلا ممتعه

وهى حل الكلمات المتقاطعة

يمكن مافيش بنات بتحب تحل الكلمات المتقاطعة

لكن انا بلاقى متعة بجد وانا بحلها واحاول اعرف معلومات جديدة

علشان اعرف احلها وهى على فكرة هى بتخلى الواحد

يكتسب معلومات عامه حلوة اوى

بس للاسف كل ده اتنسى مجرد ما بدأت ادخل عالم النت

ويمكن النت هو هوايتى دلوقتى

النت عالم بجد غريب وعجيب اى حد بيدخله بيشده من اى حاجة تانية

يمكن بيعزلك عن العالم الخارجى اللى انت فيه

ويمكن النت هو الحاجة الوحيدة اللى لما بكون عليه

بيعزلنى عن اى حاجة تانية

وخصوصا لما بيكون ليك اصدقاء بتحبهم وبتتكلم معاهم

يمكن النت اخدنى من حتى اصدقائى فى الحقيقة

عزلنى عن كل حاجة

حتى الخروج مابقتش احب اخرج علشان اقعد على النت

وانا بجد مش عارفة هو ادمان ولا تعود

والنت زى ما قالت ريم كل مابتعرف فيه حاجة

وبتتعلم بتبقى عايز تعرف المزيد

نفسى بجد اتعلم كل حاجة عن النت

وانا اكيد بيأثر عليا هوايتى الاولى اللى هى الرسم

علشان كدة بحاول اكتشف كل جديد فى الصور

بجمع كمية صور كبيرة جدا

يمكن انا دلوقتى بحاول ارجع تانى لموضوع الرسم

بس بطريقة متطورة شوية وهى انى ادرس الفوتو شوب

لانى اكيد ها استفيد ولانى اصلا بحب الرسم وهو هوايتى الاساسيه

وفى نفس الوقت مش هبعد عن النت فا اكيد هايكون شعور جميل انك

ترجع لهوايتك الاولى مع هوايتك اللى اخدتك من العالم اللى انت عايش فيه

وهى النت يعنى زى ما بيتقال بتضرب عصفورين بحجر واحد

وفى الاخر بقولك ميرسى ليكى يا حبيبة قلبى على التاج

وانا ها امرر التاج على اصدقاء ليا بحبهم وبعزهم

وهما

Meroooo

YoYo

Fatalfuoy
BaDBoY
واكيد طبعا لازم التاج يمر على حبيب قلبى

Sheryy

اعتراف

حبيت اوي اكتب البوست ده هنا

اعتقد ان هنا هيكون مكانه احلى

وخصوصا اني هتكلم عنك انتي

احيانا اي حد بيحتاج يصارح نفسه بشوية حقائق

وانا فعلا حسيت اني عايز اصارح نفسي

وهنا على صفحات بلوجك الجميل

فانا اعترف انك عملتيلي حجات كتير اوي

وكان ليكي تاثير كبير في حياتي

وبعترف ان مفيش في الكون كله واحده

بطيبتك وجمالك واخلاقك

ولا واحده ممكن تحبني زي منتي بتحبيني

او ممكن انا احبها زي ما بحبك

لان الانسان اللي يلاقي واحدة زيك

معتقدش انه ممكن يفرط فيها ابدا

لان في بشر تحس انهم كنز

بمجرد ما تقرب منهم انت الكسبان

وانتي واحده من الناس دي

اللي يكفيني بجد اني اكون حبيبك

ده لوحده حاجه بالنسبالي كبيرة اوي

لانك انسانه قدرة فعلا على العطاء

في زمن اتعودت فيه الناس تاخد ما تديش

او تاخد بس مستنية مقابل

وانتي عمرك مستنيتي مقابل

لو هتكلم عليكي اعتقد ان الكلام عمرة ما هيكفي

علشان كده يا حبيبي

انتي مش مجرد انسانة بحبها

ومعتقدش اصلا ان كان في يوم علاقتنا في بعض

كعلاقة اي اتنين بيحبو بعض

في ناس كتير استغربت عن ابتعادي بشكل كبير عن الحياة الاجتماعية

او مابقتش متواجد وسط الناس زي الاول

ده لاني لما بحب بدي وقتي كله للبحبه

فما بالك لما احب انسانة زيك

انسانه بجد تغني اي حد عن اي حد

وحبنا الكبير اوي

يخلينا في غنى اننا نحتاج اي حاجه

اخر حاجه كنت عايز اقولهالك اني بجد فخور بيكي جدا

وبحبك جدا جدا جدا

ويارب ايامك تبقى كلها سعادة

وربنا يخليكي ليا يارب

shery33

أحـــبـبـت

أحببت الكون لأنك فيه

أحببت نفسي لأنك تملكها

أحببت الشعر لأنك الشعور الصادق الذي يحتويني

أحببت الطيور لأنها تشبهك في الطيران..فهي في السماء وأنت في فضاء قلبي

أحببت القمر لأني أرى ملامحك من خلاله ونورك من نوره الساطع

أحببت الحياه فقد اصبحت حياتي التي أعيشها بكل صدق واخلاص ومحبه

أحببت منامي فقد اصبحت أجمل أحلامي التي تزورني كل ليله

أحببت سهري لأنه لك..أحببت الحب لأنه أنت

أحببت الشمووع لأنها تذكرني بفؤادي المشتعل دوووما بنارحبك

أحببت الأطفال لأنك منهم ! فأنت طفلي الكبير الذي له كل دلالي واهتمامي

أحببت البرد لأنك داافئ وتلهبني بدفئك وتحميني من لسعات البرد القاسية

أحببت الناس لأنك منهم..أحببت كلامك فهو خواطري

أحببت الورود فأنت شذاها..وهي تعبير خالص عن مدى حبي الكبير لك

أحببت الحنان لأنك حنوون حد البكاء وهذا سر حبي لك

أحببت الجنون لأنه من حبك وهو آخر درجات الحب

أحببت طيشك البرئ لأنه مني وفيه أجد طفولتي الضائعه

أحببت أنفاسك العطرة فهي هوائي الذي أتنفسه بكل لحظاتي وحالاتي

أحببت السعادة لأني عرفتها معك..في محياك في عيونك في وجودك معي

أحببت الغرور لأنك غروري وثقتي وكبرياائي الجميل

أحببت كل شئ لأني معك..أحببت كياني لأنه أنت

أحببت دنياي فقد لونتها بريشتك المبدعه بلون زهري جميل

فأحببتها وأحببتها وأحببتها ولكنى احببتك اكثر

كلمات منقوله تعبر عن احساسى

اهداء خاص لشيرى