النهاردة وانا بقرأ الجرايد لقيت حاجة لفتت نظرى
هو مقال للصحفى الكبير محسن محمد فى جريدة الجمهورية
المقال كبير جدا بس فى منه جزء اول لما قرتيه فكرنى بحاجة
فعلا شوفتها ولاحظتها و تقريبا الكلام اللى هو كاتبه ده
دا اللى انا شوفته وبيحصل فعلا وهو المحمول حول الكعبة
المحمول وما ادراك ما المحمول
وهذا جزء من كلام الكاتب الكبير محسن محمد
ومن هنا يدخل كثير من المصلين والداعين والمعتمرين إلي المسجدين
ومعهم المحمول ولو أنه بقي صامتاً لا يدق ولا يرن
ولو أنهم امتنعوا عن الحديث فيه ما كان لأحد أن يشكو
ولكني رأيت البعض لا يكتفي بأن يتكلم فيه في ساحة المسجدين
بل أثناء الطواف حول الكعبة
والبعض يبكي والبعض يبتهل والكل يردد الأدعية إلي الله
ولكنك تسمع من يتحدث في المحمول في شئون الدنيا
فيجعل الآخرين يخرجون من حال الدين إلي أحوال الدنيا
فهم يتكلمون في كل شيء ورجال الدين الذين يفتون في كل شيء هذه الأيام
لا يشيرون إلي مسألة حمل هذا التليفون داخل المساجد بصفة عامة أو في الحرمين الشريفين
بجد كلامة خلانى افتكرت حاجات حصلت معايا وشوفتها فعلا بعنيا
لما كنت فى العمرة فى رمضان اللى فات
سافرت العمرة مع بابا وماما فى العشرايام الاخيرة من رمضان
عقبالكوا كدة يارب
وكنت فى منتهى السعادة ومين ما يفرحش انه مسافر يعمل عمره
وامتى فى العشرة الاواخر من رمضان وهى فيها ليلة القدر
التى من قامها إيمانا واحتسابا غفر الله ماتقدم من ذنبه
بجد كانت سعادتى ما تتوصفش بس انا اتصدمت لما روحت هناك
لقيت حاجات اغرب من الخيال
قضيت 3 ايام جميلة فى المدينة ومهما اوصف فى جمال الحرم النبوى مش هقدر اوفيه قدره
ثم بدأت رحله العذاب والضنا من المدينة الى مكه
اتحركنا قبل اذان المغرب من المدينة متوجهين لمكة المكرمة
طبعا اذن علينا االمغرب وكنا طبعا كلنا صايمين
فطرنا على ميه وتمر فى الاتوبيس اللى كنا فيه روحنا وعملنا احرامنا فى ابيار على
و رجعنا تانى نكمل رحلتنا وطبعا احنا راكبين ومش عارفين اى حاجة فى الطريق
وقف بينا السواق(وهو سودانى الجنسية) فى استراحة غير اللى كانوا قايلين عليها
قولنا مش مهم ما علينا اهو حاجة نريح فيها شوية من قاعدة الاتوبيس المتعبة
طبعا كل ده ومافيش فطار الا هى الميه والكام تمرة اللى فطرنا عليهم لما المغرب اذنت
وما ادراك ما الاستراحة استراحة بجد غير اداميه بالمرة
بس قلنا خلاص عادى احنا رايحين نعمل العمرة بلاش نتكلم كتير
ورجعنا تانى الاتوبيس علشان نكمل رحلتنا الى مكه
اللى اعرفه ان الطريق من المدينه لمكه اقصى حاجة ممكن تستغرقها فى الطريق 7 ساعات
دا بالكتير اوى انما ناخد اكتر من 10 ساعات او تقريبا 11 ساعة فى الطريق
وكل ده من غير لا فطار ولا سحور غير القاعدة المتعبه اللى فى الاتوبيس
كل ده بسبب ان السواق مش عارف الطريق مش عارف يوصلنا مكه
وتاه ويلف بينا ويرجع تانى من مكان ما بدأ واحنا طبعا كنا فى حاله يرثى لها
تعبنا طبعا من كتر اللف وناس كتير اوى تعبت لان كان معانا ناس كبار فى السن
ومش متحملين اللف دا كله يادوب الحمدلله وصلنا قبل اذان الفجر تقريبا بربع ساعة
جرينا حطينا الشنط فى الفندق و شربنا ميه بعدها الفجر اذن نزلنا صلينا الفجر
و توكلنا على الله علشان نعمل عمرتنا طبعا الحرم ليه رهبه مختلفه تماما عن اى مسجد اخر
دخلنا الحرم فى وسط زحام شديييييييد ولا يوم الحشر
طبعا اول ما عنينا وقعت على منظر الكعبة دموعنا بقت تنزل لوحدها
و بقينا عمالين ندعى بدأنا نعمل عمرتنا وبدأنا طبعا بالطواف
مهما وصفت الزحام اللى هناك مش ممكن اقول عليه فعلا غير يوم الحشر
كنا ماسكين انا وماما فى بابا جامد اوى لان لو حد فينا ساب التانى مش ها يلاقيه
طبعا مش هقول التعب بجد اللى كنا فيه احنا كنا تقريبا بنحارب علشان نعرف نطوف
لكن رغم دا كله والتعب دا كله لفت نظرى بجد حاجة غريبه جدا
ان الناس وهى بتطوف فى منهم ماسكين الموبايل وعمالين يتكلموا
الله؟؟؟؟؟؟
هو ايه اللى انا شيفاه ده يمكن تأثير الزحمه والتعب والارهاق مش شايفة كويس
بس للاسف انا مالقتش رجاله بس بتتكلم لا دا رجاله وستات
ماسكين الموبايل فى الطواف بيطوفوا وبيتكلموا
اللى اعرفه ان المفروض الواحد بيدعى اثناء الطواف
لكن اطوف وانا بتكلم وبهزر وبضحك فى الموبايل اهو ده كان حاجة غريبه جدا بالنسبالى
قلت معلش يمكن دى تليفونات ضرورية ولازم يتكلموا
خلصنا الطواف بعد ما كنا هانموت طبعا فى الزحام و بنكمل عمرتنا
و وصلنا للسعى بين الصفا والمروة دخلنا السعى وبدأنا
لقيت برضة ناس فى السعى ماسكة الموبايل و عماله تتكلم و تضحك
استغفر الله العظيم هو انا بعمل العمرة فى الحرم المكى ولا فى شرم الشيخ
حسيت ان ضغطى علي عليا بجد
لا واللى يغيظ ويفرس بجد انك وانت بتصلى فى الحرم تلاقى جنبك موبايل بيرن
و اغنية شغاله عادى غصب عنك ها تخرجك من خشوعك فى الصلاة
طيب ليه حتى مانقفلش الموبايل واحنا داخلين الحرم؟؟؟؟
بلاش نقفله نعمله سايلنت
فين قدسيه المكان اللى احنا فيه ؟؟؟؟؟
بقيت مستغربه من اللى شيفاه
بقيت اقول ايه اللى احنا وصلناله ده فين الخشوع والبكاء والدعاء؟؟؟؟؟؟؟؟
كل دا راح فين ؟؟؟؟؟؟؟؟
ايه اللى بقينا فيه ده
ونقول حرب شرسة ضد الاسلام والمسلمين طيب ايه اللى بيعمله المسلمين ده ؟
ازاى فى مكان زى دة ويحصل فيه كدة
ازاى وانا بطوف ولا بسعى بدل ما ادعى وابكى ندما على كل اخطائى
اقعد اتكلم واضحك فى الموبايل؟؟؟؟
ازاى ابقى فى الحرم واسمع اغنية طالعة من موبايل ؟؟؟؟؟؟؟؟
الف سؤال وسؤال داروا فى دماغى وقتها بس مالقتش اى اجابة على اسألتى دى
انا يمكن حاولت اختصر على قد ما اقدر فى كلامى
ويمكن فى حاجات كتير اوى اوى ما قولتهاش
لانى لو فتحت فى الكلام ها اقول كلام صعب انه يتقال
صعب علينا كا مسلمين اننا نوصل للحال ده
ويمكن ماكنتش احب اتكلم فى حاجة زى دى
بس الواضح ان الموضوع بقى اكبر من كدة
والدليل على كدة انه اتكتب عنه فى الجرايد يعنى بقى شئ ملحوظ وزاد عن حده
بجد مش هقول غير انى فعلا متغاظة ومفروسة من اللى بشوفه واللى بيحصل
والسلام ختام
اللهم اعز الاسلام والمسلمين واذل اعدائك اعداء الدين
اللهم اميييييييييييييين
8 comments:
بجد يا رورا البوست دة مهم اوى
لان فعلا بقى فى ناس كتير اوى بتستهبل فى مصر وتدخل المسجد بالموبايل وحتى مش بتعملة سايلنت
فى رمضان السنة دى كذا مرة حصلت فى المسجد والشيخ اتلغبط فى الصلاة لان الاغنية الى اشتغلت (ياطبطب وادلع)
تخيلى الشيخ بيقرأ سورة مريم وكلنا فى خشوع تام وفجاة تلاقى الست نانسى جت لنا فى الصلاة
واحمد يومها طبع ورق ولصقة فى المسجد
اخشع فى صلاتك)
واغلق المحمول)
وبردة ناس اغبية كانت بتسيبة ومحترمتش نفسها ولا اهتمت بالى حصل
لكن متوقعتش ابدا ابدا ان دة يحصل فى مكة
فى اقدس مكان فى الدنيا
الى الناس كلها بتحلم بس تلسم ترابة
بجد انا مصدومة
اكتر منا مفروسة
ربنا يهدينا جميعا
اللهم اعز الاسلام والمسلمين واذل اعدائك اعداء الدين
ويارب نعتز بديينا ونحترمة عشان باقى العالم يحترمنا
بجد بوست جامد يا رورا
وعمرة مقبولة ان شاء الله يا حبيبتى(k)
معلش طولت عليكى انا:d
اللهم امين يارحاب
والله انا مش عارفه اقولك ايه في كلامك ده
بس لو كلمتي حد فيهم ولا قولتيه بلاش وبتاع هيقولك انا سايب اهلي ومصالحي ولازام اطمن عليها ومش عارفه ايه وهتلقي معاهم حق
مش عارفه اقولك ايه ربنا يهديهم واكيد له حكمه انه يسيبنا كده
وفي الاول والاخر احنا خير امه
وصلي علي سيدنا رسول الله
رورا فعلا اللى انتى حكيتهولى كان شئ اول مره اسمعه فى حياتى
المفروض ان اللى رايح يحج او يعتمر ده بينسى كل حاجه وبيبقى متوجهه لله فقط
انا مش عارفه بجد الناس حصلها ايه
رايحين وكانهم بيعملو ده كل يوم
مافيش خشى ولا رهبه ولا خوف
ده الواحد وهو بيصلى بيبقى بيحاول يستغفر ويقاوم الشيطان فما بلك وهو بيعتمر او بيحج
بجد بقت حاجه فعلا تستفز
الناس نسيت دينها ومبقاش فى قلوبها اى خوف او خشى او رهبه
حسبى الله ونعم الوكيل
رحاب:
اولا اللهم تقبل ان شاء الله
ثانيا: اللي انتي شفتيه دة عادي جدا انه يحصل هناك وخاصة في العشر الاواخر من رمضان بتبقى الزحمة مش طبيعية وكأن الناس هتموت بعضها ع العمرة رغم انها مفتوحة وعلى طول بس الايام دي بالذات بتبقى ليها فضل تاني خالص
انا عشت في السعودية سنتين وعملت ولله الحمد عمرات كتيرة بس فعلا كان اصعبها هي عمرات رمضان
طبعا المسئوليه بتقع ع الناس وكمان على السلطات هناك اللي ما بتعملش حملات توعية للناس انهم مايستخدموش الموبايل في اثناء العمرة
عموما كويس قوي انك ماحكتيش كل اللي شوفتيه لاني عارف كويس قوي انتي كنتي هتتكلمي عن ايه وشوفتي ايه
تحياتي ليكي
بوبا حبيبة قلبى
مافيش اكتر من الناس اللى بتستهبل بجد و الواحد بيشوف منهم كتير اوى ومهما اتكلمتى كلامك مش بيعجبهم
محدش ضد ان يبقى الواحد معاه موبايل لكن لازم فى حالات الموبايل ده يتقفل و خصوصا وقت الصلاه او فى المسجد اى مكان عبادة لازم الموبايل يتقفل فيه
مش عارفة ازاى بجد يبقى فى المسجد والموبايل يرن ونطلع منه اغنية تشتت الواحد اصلا وتخرجة عن صلاته
و لسة يا بوبا ياما هانشوف
ماتحرمش منك يا قمر ولا من ردودك (k)
ميرو يا قمر
مافيش حاجة اسمها سايب مصالحى واهلى فى اماكن زى دى
كان يقعد جنبهم افضل
انما ناس بتطوف وهى بتتكلم فى الموبايل فين بقى العبادة
صعب اوى اللى بيحصل بجد
وربنا يهديهم ويهدينا جميعا يارب
تسلميلى يا حبيبة قلبى يارب (k)
ريمووووووو يا قلبى
هى فعلا بقت حاجة مستفزة جدا جدا
ويمكن اللى حكيتهولك لما رجعت واللى قرتيه فى البوست دا شئ بسيط جنب اللى
الواحد شافه بجد
والله يا ريمو منا عارفة الناس جرالها ايه
مابقاش فعلا فى لا رهبه ولا خوف من اللى خلقهم استغفر الله العظيم
ربنا يهدى كل عاصى يارب
تسلميلى يا حبيبة قلبى يارب (k)
ربنا يتقبل منا ومنك بأذن الله يا سمير
انا اول مرة اطلع عمرة رمضان بصراحة انا طلعتها قبل كدة بس ماكنش فى رمضان وكانت متعه فعلا
بس اول مرة اطلعها فى رمضان و بجد كانت فعلا صعبه جدا جدا
والمفروض يا سمير من غير توعيه من السلطات او من اى حد احنا المفروض مسلمين وعارف ايه اللى المفروض يتعمل
بس الناس خلاص الواضح انها مابقتش تفرق بين اللى يصح واللى مايصحش
وانا فعلا مارضتش اتكلم ولا اقول اى كلام اكتر من كده لان الكلام كتير اوى وفعلا يضايق
و ربنا يهدينا جميعا يارب
ميرسى ليك جدا يا سمير على مرورك وردك
نورتى
Post a Comment